Бүгінде Қарулы Күштердің, басқа да әскерлері мен әскери құралымдардың қатары еліміздің ең беделді әскери оқу орнында білім алған жоғары білікті офицерлермен толықтырылады. Биылғы оқу жылында университеттің 150-ден астам түлегі, оның ішінде Ұжымдық қауіпсіздік шарты ұйымы елдерінің әскери қызметшілері – 20 адам (Тәжікстан Республикасы – 16 адам, Қырғыз Республикасы – 4 адам) теориялық оқытудың толық курсынан сәтті өтіп, мемлекеттік аттестаттау комиссиялары алдында үздік білімдерін көрсетті. Барлық түлектерге Ұлттық қауіпсіздік және әскери іс магистрі дәрежесі берілді.
Салтанатты іс-шараға Қорғаныс министрінің Бірінші орынбасары – Қазақстан Республикасы Қарулы Күштерінің Бас штаб бастығы генерал-лейтенант С. Камалетдинов, Қырғыз Республикасының Төтенше және Өкілетті елшісі Дастан Станбекұлы Дюшекеев, Тәжікстан Республикасының Әскери атташесі генерал-майор Фозил Файзи мен күш ведомстволарының өкілдері қатысты.