Республика күні қарсаңында еліміздің жетекші әскери жоғары оқу орнында ұлттық мерекеге арналған шара өтті. Офицерлер осындай әсем вальс арқылы сыпайылық, талғампаздық пен бекзаттық әдептерін көрсете алды.
Офицерлер балы – ұрпақтан-ұрпаққа жалғасып келе жатқан жақсы дәстүр. Әскери қызметшілер мұнда жаңа қырынан көрінеді. Жұптар арасындағы қарым-қатынастың тартымдылығы, әсемдігі мен ерекше талғамы да осы сәтте байқалады.
Джакомо Пуччинидің «Богема» операсынан Мюзетта ариясын орындаған Президенттік оркестрдің әншісі Әсел Модикешева бал басталар сәтте бәріне тамаша көңіл-күй сыйлады. Қарулы күштердің Ұлттық әскери-патриоттық орталығы мен Ұлттық ұлан ансамблінің шығармашылық ұжымдары көрермендерге жарқын әсер қалдырды.
Қорғаныс министрінің орынбасары генерал-лейтенант Сұлтан Камалетдинов басқарған қазылар алқасы офицерлер жұптарының жұбайларымен сөйлеген сөздерін бағалады.
– Бұл шараны Ұлттық мереке – Республика күніне арнадық. Әскерилер арасындағы офицерлік бал ежелден бекзаттықтың, ханымдарға деген көзқарастың, сүйіспеншілік пен адалдықтың символы болып табылады, – деп атап өтті Қорғаныс министрінің орынбасары.
Әскери-гуманитарлық ғылымдар факультетінің мүшелері офицерлер балында үздік деп танылды. Жекелеген жұптар «Көркемдік», «Үйлесімділік», «Бірегейлік» және «Грация» аталымдары бойынша марапатталды.